గ్రూప్​ 2 పరీక్ష జనవరి 6, 7 తేదీల్లో జరుగుతుందా… లేదా.. నిరుద్యోగుల్లో ఇదే హాట్ టాపిక్​గా మారింది. ఇప్పటికీ తెలంగాణలో కొత్త ప్రభుత్వం కొలువు తీరలేదు. ఈలోపున టీఎస్​పీఎస్​సీ గ్రూప్​ 2 ఎగ్జామ్​ నిర్వహణకు ఏర్పాట్లు మొదలు పెట్టడం.. ప్రధానంగా గ్రూప్​ 2 పరీక్షకు అప్లై చేసుకున్న అభ్యర్థులను గందరగోళానికి గురి చేస్తోంది. ఇప్పటికే ప్రకటించిన షెడ్యూలు ప్రకారం జనవరి 6, 7 తేదీల్లో గ్రూప్​ 2 పరీక్ష జరగాల్సి ఉంటుంది. కానీ.. ఎన్నికల సమయంలో టీఎస్పీఎస్సీ వైఫల్యాలు ప్రధాన పార్టీల ఎజెండాగా మారాయి. ఏకంగా బోర్డును ప్రక్షాళన చేస్తామని.. బోర్డును రద్దు చేస్తామంటూ అటు బీఆర్​ఎస్​ ఇటు కాంగ్రెస్​ లీడర్లు హామీలు ఇచ్చారు. ఎన్నికల్లో కాంగ్రెస్​ గెలిచింది. కానీ.. అధికార పగ్గాలింకా చేపట్టలేదు. ఇప్పటివరకున్న సమాచారం ప్రకారం 7వ తేదీన సీఎం సహా పూర్తి కేబినేట్​ ప్రమాణ స్వీకారం చేసే అవకాశాలున్నాయి. ఏదైనా సమీకరణాలతో పూర్తి కేబినేట్​ ఎంపిక ఆలస్యమైతే మరో రెండు రోజులకు మించి పట్టదు. అంటే డిసెంబర్​ 7వ తేదీన.. లేదా 9వ తేదీన కొత్త ప్రభుత్వం కొలువు దీరటం ఖాయం.

అప్పటిదాకా టీఎస్​పీఎస్​సీ తీసుకుంటున్న కొత్త నిర్ణయాలు.. సన్నాహాక ఏర్పాట్లన్నీ.. పక్కాగా అమలవుతాయా.. అంటే సందేహమే. ఆ తదుపరి కొత్త ప్రభుత్వం తీసుకునే నిర్ణయాలు, ఇచ్చే ఆదేశాల మేరకు టీఎస్​పీఎస్​సీ తదుపరి కార్యాచరణ ఉంటుందనేది ముమ్మాటికి నిజం. కానీ ఎన్నికల కోడ్​ ముగిసినందున పబ్లిక్​ సర్వీస్​ కమీషన్ మాత్రం ముందుగా ప్రకటించిన షెడ్యూలు ప్రకారం పరీక్షలకు ఏర్పాట్లు చేసుకునే పనిలో పడింది. తమకున్న అధికారాలు, బాధ్యతల మేరకు టీఎస్​పీఎస్​సీ యథాతథంగా పరీక్షల ఏర్పాట్లలో నిమగ్నమైందని అర్థమవుతోంది. కేవలం నెల రోజులే వ్యవధి ఉండటంతో గ్రూప్​ 2 పరీక్ష ఏర్పాట్ల విషయంలోనూ టీఎస్పీఎస్​సీ అదే చేసింది. జనవరి 6, 7 తేదీల్లో నిర్వహించాల్సిన పరీక్షకు అవసరమైన ఏర్పాట్లు చేయాలని అన్ని జిల్లాల కలెక్టర్లకు టీఎస్​పీఎస్​సీ సెక్రెటరీ అనితా రామచంద్రన్​ మంగళవారం సర్క్యులర్​ జారీ చేశారు. పరీక్ష కేంద్రాలుగా ఎంపిక చేసిన విద్యా సంస్థలకు సెలవులు ఇవ్వాలని సూచించింది. దీంతో నిరుద్యోగుల్లో కలవరపాటు మొదలైంది. ఇప్పుడున్న పరిస్థితుల మేరకు ఏర్పాట్లు జరుపుతున్నామని, తదుపరి ప్రభుత్వం తీసుకునే నిర్ణయం మేరకు పరీక్ష జరుగుతుందా.. లేదా డిసైడ్​ అవుతుందని టీఎస్​పీఎస్​సీ వర్గాలు చెబుతున్నాయి.

పేపర్ల లీకేజీ.. వరుసగా పరీక్షల రద్దు.. నిర్వహణ వైఫల్యాలు.. అన్నింట్లో కోర్టు కేసుల కారణంగా ఇప్పుడున్న టీఎస్​పీఎస్​సీ బోర్డు నిరుద్యోగుల విశ్వాసం కోల్పోయింది. అందుకే టీఎస్​పీఎస్​సీ బోర్డును రద్దు చేయాలనేది ఎన్నికల్లో నిరుద్యోగుల ప్రధాన డిమాండ్​. అదే ప్రధాన పార్టీలు తమ నినాదంగా వాడుకున్నాయి. దీంతో.. టీఎస్​పీఎస్​సీ మళ్లీ గ్రూప్ 2 ఎలా నిర్వహిస్తుంది.. ఈ బోర్డు నిర్వహిస్తే.. మళ్లీ పాతకథనే పునరావృతమవుతుందనేది నిరుద్యోగుల ఆందోళన.

నిజానికి కొత్త ప్రభుత్వం కొలువు దీరగానే.. ప్రభుత్వం ముందున్న ప్రధాన అంశాల్లో ఉద్యోగ నియామకాలు కీలకం. అందుకే టీఎస్​పీఎస్​సీపై వీలైనంత తొందరగానే పలు ప్రక్షాళన చర్యలు.. అవసరమైతే బోర్డు రద్దు.. కొత్త పాలకవర్గం నియామకం జరిగే అవకాశాలు ఉన్నాయి. కానీ.. ఇదంతా జరగాలంటే.. కనీసం నెల రోజులు పడుతుందనే విషయం నిరుద్యోగ లోకం గుర్తించాలి. ఈలోపు ఆన్​గోయింగ్​ పరీక్షలు.. ఫలితాలు వెలువడుతాయా.. లేదా అనే విషయంలోనూ ప్రభుత్వం తొలి వారంలో నిర్ణయం తీసుకునే అవకాశాలున్నాయి. అప్పటివరకు నిరుద్యోగులు వేచి చూడాల్సిందే.

కాంగ్రెస్​ పార్టీ తమ ఎన్నికల మేనిఫెస్టోలో జాబ్​ క్యాలెండర్ ప్రకటించింది. జాబ్​ క్యాలెండర్​ ప్రకారం ఉద్యోగ నియామకాలు చేపట్టడం ఆ పార్టీ కొత్త ప్రభుత్వంపై ఉన్న గురుతర బాధ్యత. ఈలోపు ఉన్న కోర్టు కేసులు, వివాదాలపై కొత్త కేబినేట్​ తీసుకునే నిర్ణయాలు కీలకంగా మారనున్నాయి. ​కొత్త జాబ్​ క్యాలెండర్​ వెంటనే ప్రభుత్వం అమలు చేస్తుందా.. ముందుగా టీఎస్​పీఎస్​సీ విషయంలోనే కీలక నిర్ణయాలు తీసుకుంటుందా.. యుద్ద ప్రాతిపదికన ఈ రెండింటినీ ముందుకు తీసుకెళ్లి నోటిఫికేషన్లు జారీ చేస్తుందా.. అనేది వేచిచూడాలి.

మరోవైపు ఎన్నికల ముందు గ్రూప్​ 4 ఫైనల్​ కీ విడుదల చేసిన టీఎస్​పీఎస్​సీ ఇప్పటివరకు జనరల్ ర్యాంకింగ్​ లిస్ట్ విడుదల చేయలేదు. ఎన్నికల ముందు బీఆర్​ఎస్​ ప్రభుత్వం సూచనలతోనే ఈ లిస్ట్ రిలీజ్​ చేసేందుకు టీఎస్​పీఎస్​సీ వెనుకాడింది. కానీ.. దాదాపు 7 లక్షల మంది అభ్యర్థులు ఈ మెరిట్​ లిస్ట్ కోసం వేచిచూస్తున్నారు. ఎన్నికల కోడ్​ ఉందనే సాకు చూపించి ఈ లిస్ట్ పెండింగ్​లో పెట్టిన టీఎస్పీఎస్​సీ.. ఇప్పుడు ఎన్నికల కోడ్​ ముగియటంతో ఎలాంటి సమాధానం చెపుతుందో వేచి చూడాలి.

నిన్న టీఎస్​పీఎస్​సీ జారీ చేసిన సర్క్యులర్​..