తెలంగాణాలో ఐదేళ్ల తర్వాత నిర్వహించిన​ టెట్​–2022 ఉత్తీర్ణతా శాతం భారీగా తగ్గడం సర్వత్రా చర్చనీయాంశంగా మారింది. టెట్​ అధికారులు జూన్​ 30న విడుదల చేసిన ఫైనల్​ ‘కీ’ ప్రకారం అభ్యర్థులు తమకు వచ్చిన మార్కులను చెక్​ చేసుకున్న దానికి ఈ రోజు విడుదల చేసిన ఫలితాలను బేరీజు వేసుకుంటే చాలా తేడాలున్నాయని ఆందోళన చెందుతున్నారు.

ఫైనల్​ ‘కీ’లో పేపర్​–1లో 4 ప్రశ్నలకు యాడ్​స్కోర్​, 4 ప్రశ్నలకు 2 ఆప్షన్లు, పేపర్​–2కు 4 ప్రశ్నలకు యాడ్​స్కోర్​, ఒక ప్రశ్నకు 2 ఆప్షన్లు ఇచ్చారు. వీటన్నింటికి లెక్కవేస్తే సుమారు ప్రతి క్యాండిడేట్​కు పేపర్​–1లో 6 నుంచి 8 మార్కులు, పేపర్​–2లో 2 నుంచి 5 మార్కులు కలిసాయి. అయినా కూడా ఉత్తీర్ణతా శాతం తగ్గడం అనుమానాలకు తావిచ్చింది. గతంలో పోల్చుకుంటే ఈసారి టెట్​ ప్రశ్నాపత్రం భిన్నంగా ఉందని, కొన్ని ప్రశ్నలు తికమక పెట్టినా.. ఉత్తీర్ణత శాతం పెరుగుతుందని అందరూ భావించారు. కానీ పేపర్–1లో కేవలం 32.68 శాతం, పేపర్​–2లో 49.64 శాతం ఉత్తీర్ణత రావడం అందరినీ ఒకింత ఆశ్చర్యపరిచింది.

టెట్​ నోటిఫికేషన్ ప్రకారం 150 మార్కులకు గాను ఎస్సీ, ఎస్టీ, వికలాంగులకు 40శాతం, బీసీలకు 50శాతం, ఓసీలకు 60 శాతం మార్కులు రావాలి. క్వాలిఫై పర్సంటేజీ తగ్గడంతో రాష్ట్రంలో ఉపాధ్యాయ నియామకాలకు ముందే మరో టెట్​ నిర్వహించాలని క్వాలిఫై కానీ అభ్యర్థుల నుంచి డిమాండ్ వస్తోంది.

జిల్లాల వారీగా అభ్యర్థులు క్వాలిఫైడ్​ పర్సంటేజీ చూస్తే.. పేపర్​–1లో అత్యధికంగా 38.09 శాతం జోగులాంబ గద్వాల, అత్యల్పంగా 27.37 శాతంతో రంగారెడ్డి జిల్లా చివరి స్థానంలో నిలిచింది. పేపర్​–2లో అత్యల్పంగా నారాయణపేట జిల్లా, 56.98 శాతంతో భద్రాద్రి కొత్తగూడెం మొదటి స్థానంలో నిలిచింది.