గ్రూప్‌-1 ప్రిలిమ్స్‌ క్వాలిఫై అయ్యే ఛాన్స్​ ఉన్న అభ్యర్థులందరూ వెంటనే మెయిన్స్​ ప్రిపరేషన్​ మొదలు పెట్టాలి. ఈసారి మెయిన్స్‌ పరీక్ష ఎలా ఉంటుంది, ప్రిపరేషన్‌ ప్లాన్ ఎలా ఉండాలనేది సబ్జెక్ట్ నిపుణులు అందించిన సూచనలు ఇక్కడ అందిస్తున్నాం. మెయిన్స్‌ తెలుగు, ఉర్దూ, ఇంగ్లిష్‌ భాషల్లో ఉంటుంది. జనరల్‌ ఇంగ్లిష్‌ తప్ప మిగతా ఆరు పేపర్లు మూడు భాషల్లోనూ రాయవచ్చు. క్వాలిఫైయింగ్‌ పేపర్‌ జనరల్‌ ఇంగ్లిష్‌ దాదాపు ఎస్‌ఎస్‌సీ సిలబస్‌ అనుసరించి ఉంటుంది.

పేపర్1 – జనరల్ ఎస్సే:

జనరల్ ఎస్సే కోసం ప్రత్యేకంగా చదవాల్సిన అవసరం లేదు. కానీ ప్రాక్టీస్ తప్పనిసరి ఉండాలి. దీనిలో మొత్తం మూడు సెక్షన్లు ఉంటాయి. 1) సమకాలీన సామాజిక అంశాలు, సమస్యలు– ఆర్థిక అభివృద్ధి, న్యాయపరమైన అంశాలు, 2) భారత రాజకీయ స్థితిగతులు–భారతీయ చరిత్ర సాంస్కృతిక వారసత్వం,3) సైన్స్‌ అండ్‌ టెక్నాలజీ అభివృద్ధి– విద్య, మానవ వనరుల అభివృద్ధి ఇలా మూడు సెక్షన్లుగా విభజిస్తారు. ప్రతి సెక్షన్కు 2 సబ్జెక్టుల నుంచి ప్రశ్నలు ఇస్తారు.  అందులో ఒక ప్రశ్నకు సమాధానం రాయాలి. సంపూర్ణ అవగాహన ఉన్న సబ్జెక్ట్ను ఎంపిక చేసుకోవడం ఉత్తమం. ఉదాహరణకు సెక్షన్2లో భారత రాజకీయాలు లేదా భారత చారిత్రక, సాంస్కృతిక సంపద అంశాలు ఉంటాయి. ఇందులో చరిత్ర మీద పట్టు ఉంటే రెండో దాన్ని సెలెక్ట్ చేసుకోవడం బెటర్.

పేపర్ 2,  సెక్షన్–1 భారతదేశ చరిత్ర, ఆధునిక చరిత్ర:  

డిగ్రీలో చరిత్ర నేపథ్యం లేని అభ్యర్థులకు ఈ సెక్షన్ చదవడానికి ఎక్కువ సమయం పడుతుంది. కారణం ప్రాచీన, మధ్యయుగ చరిత్రకు రెండు యూనిట్లలో ఎక్కువ సమయం కేటాయించాలి. మంచి వ్యూహంతో చదివితే సులభం అవుతుంది.  3,4,5 యూనిట్లు ఆధునిక చరిత్రకు సంబంధించినవి అయితే సిలబస్ ప్రకారం ఎక్కువగా కనబడిన, స్థూలంగా చూస్తే సమాధానాలు రాయచ్చు. చరిత్రకు సంబంధించి ప్రామాణికమైన పుస్తకాలను చదివి సొంతంగా నోట్స్ తయారు చేసుకోవాలి. రోజుకు కనీసం ఐదు ప్రశ్నలు రాసి సంబంధిత సబ్జెక్ట్ ఎక్స్పర్ట్తో కరెక్షన్ చేపించుకుంటే అందరికంటే ప్రతి ప్రశ్నకు ఒకటి లేదా రెండు మార్కులు అదనంగా పొందవచ్చు. చరిత్ర సబ్జెక్టుకు ‘కీ పదాలు’ చాలా ముఖ్యం. ప్రశ్నను సరిగ్గా అర్థం చేసుకోకపోతే సమాధానం పక్కదారి పడుతుంది. కీ పదాలు అంటే ఉదాహరణకు ‘వర్ణించండి’ అన్నప్పుడు వివరించకూడదు, సాధ్యమైనంత వరకు వాస్తవ ఆధారాలతో సమాధానం రాయాలి.

పేపర్ 2, సెక్షన్–2 తెలంగాణ చరిత్ర, ఆధునిక చరిత్ర:  

ప్రాచీన తెలంగాణ చరిత్రకు సంబంధించి స్టాండర్డ్ పుస్తకాలను మాత్రమే చదవాలి. లోకల్ పుస్తకాలలో చాలా వరకు ప్రామాణికమైన సమాచారం లేదు. చరిత్రను బాగా అవగాహన చేసుకుంటే కాని సమాధానం సరిగ్గా రాయలేము. ఉదాహరణకు హెరిటేజ్ గురించి రాయమంటే హెరిటేజ్ అనే పదాన్ని బ్రాడ్గా అర్థం చేసుకోవాలి. అసఫ్జాహీ వంశం గురించి నేర్చుకోవడం అంటే మొత్తం అసఫ్జాహీల చరిత్ర చదవడం కాదు. సిలబస్లో ఉన్న అంశాలపై మాత్రమే ఫోకస్ చేస్తూ ప్రాక్టీస్ చేయాలి. ఉదాహరణకు ఆరవ నిజాం, ఏడో నిజాం పాలనలో సామాజిక, ఆర్థిక అభివృద్ధి గురించి మాత్రమే చదవాలి. అంతే కాని మరో అంశం మీద దృష్టి పెట్టకూడదు. సమాధానం రాయడంలో ‘నిర్మాణం’ చాలా ముఖ్యం. ఒక ప్రశ్నకు ప్రారంభం, బాడీపార్ట్, ముగింపు సరైన పద్ధతిలో రాయాలి. ఆధునిక తెలంగాణ చరిత్రలో కొన్ని అంశాలు తెలంగాణ ఉద్యమ చరిత్రలో ఉన్నాయి అనుకుంటారు. కాని వాస్తవంగా సిలబస్లో ఇచ్చిన అంశాలు వేర్వేరు. ఆధునిక తెలంగాణ చరిత్రలో ముఖ్యంగా పోలీస్ యాక్షన్, భారత యూనియన్లో హైదరాబాద్ రాజ్యం విలీనం టాపిక్స్ మీద ఎక్కువ దృష్టి పెట్టాలి.

పేపర్ 2, సెక్షన్–3 భారత మరియు తెలంగాణ జాగ్రఫీ:

ఈ సెక్షన్లో భారతదేశ జాగ్రఫీపై రెండు యూనిట్లు మాత్రమే ఉంటాయి. కాని సిలబస్లో మొత్తం సబ్జెక్ట్ ఉంది. ఇండియా జాగ్రఫీలో మొదటి యూనిట్లో విస్తృతంగా సిలబస్ ఉంటే, రెండో యూనిట్లో పరిమితంగా మాత్రమే ఉంది. అయితే గ్రూప్1 సిలబస్ను సగం మాత్రమే చదివితే సరిపోతుంది. అనే భావన నుంచి బయటపడాలి. పూర్తి సబ్జెక్ట్ మీద పట్టుంటే కాని పరీక్షలో విజయం సాధించలేము. తెలంగాణ జాగ్రఫీపై జరుగుతున్న తొలి గ్రూప్1 పరీక్ష.  కాబట్టి కొన్ని అంశాలను ముఖ్యంగా ఫోకస్ చేయాలి. ఉదాహరణకు జనాభా, పరిశ్రమలు, వలసలు, నేలలు, ఖనిజాలు మొదలైనవి.

పేపర్ 3, సెక్షన్–1 భారతీయ సమాజం:  

ఈ సెక్షన్ సిలబస్ చాలా ఎక్కువగా ఉంటుంది. అయితే తెలంగాణ అంశాలు మాత్రం రెండు యూనిట్లలో ఉంటే, మిగతా అంశాలు మూడు యూనిట్లలో ఉన్నాయి. ఒక యూనిట్లో పూర్తిగా తెలంగాణ అంశాలు ఉంటే, మరో యూనిట్లో తెలంగాణ మరియు భారతదేశ సామాజిక విధానాలు, పథకాలు ఉన్నాయి. ఈ సెక్షన్లో రెండు యూనిట్లు సులభంగా ఉంటే, ఒక యూనిట్ మాత్రం కఠినంగా ఉంటుంది. సామాజిక సమస్యలకు సంబంధించిన యూనిట్లో ఎక్కువ అంశాలు ఉన్నాయి. కాబట్టి ఈ యూనిట్ చాలా కఠినంగా ఉండడంతో పాటు చదివేటప్పుడు అధిక సమయాన్ని కేటాయించాల్సి ఉంటుంది.

పేపర్ 3, సెక్షన్–2 భారత రాజ్యాంగం :  

ఈ సబ్జెక్ట్ చదివేటప్పుడు సులభంగా ఉండి, రాసేటప్పుడు టఫ్గా అనిపిస్తుంది. కారణం రాజ్యాంగపరమైన అంశాలు ఇమిడి ఉండడంతో పాటు కొన్నిసార్లు కేసులను కోట్ చేయాల్సి ఉంటుంది. ఈ సెక్షన్ తక్కువ సమయంలోనే పూర్తి చేయవచ్చు కాని ఆన్సర్ రాసేప్పుడు జాగ్రత్తగా ఉండాలి. రాజ్యాంగంపైన ప్రశ్నలు డైరెక్ట్గా కాకుండా అప్లికేషన్ పద్ధతిలో పరోక్షంగా ఇస్తారు. డి.డి.బసు స్థాయి పుస్తకాన్ని అర్థం చేసుకుంటే మూడు యూనిట్లకు సులభంగా సమాధానాలు రాయవచ్చు. ఒకే పుస్తకంలో అన్ని యూనిట్లకు సంబంధించిన అంశాలు పూర్తిగా ఉండవు. కాబట్టి ఒకటి కన్నా ఎక్కువ పుస్తకాలు చదవాలి.

పేపర్ 3, సెక్షన్–3 గవర్నెన్స్:  

ఈ సెక్షన్ సిలబస్ విస్తృతంగా ఉంటుంది. కాబట్టి కొన్ని ముఖ్యమైన అంశాలను ప్రిపేర్ అవ్వడం కష్టంగా ఉంటుంది. రెండు యూనిట్లకు సంబంధించిన అంశాలు పాలిటీకి లింక్ అయి ఉంటే, ఒక యూనిట్ మాత్రం ప్రభుత్వ పథకాలు, ఏజెన్సీకి సంబంధించిన అంశాలు సులువుగా అర్థం చేసుకోవచ్చు. అయితే జాగ్రత్తగా పరిశీలించి చూస్తే కొన్ని అంశాలను ఎలిమినేషన్ పద్థతిలో తొలగించవచ్చు.

పేపర్ 4, సెక్షన్–1 ఇండియన్ ఎకానమీ:  

భారతదేశ ఎకానమీ సిలబస్ లిమిటెడ్గా ఉంది. కానీ ఎకానమీపై పూర్తిగా పట్టు ఉండకపోవడం వలన కఠినంగా కనిపించవచ్చు. వ్యాసరూప ప్రశ్నల్లో కొన్నింటికి సంఖ్యలు గుర్తు పెట్టుకోవాల్సి వస్తుంది. కాబట్టి సంఖ్యలను కోట్ చేసేటప్పుడు ఖచ్చితంగా గుర్తు ఉంటేనే రాయాలి. రెండు యూనిట్లు సులభంగా ఉంటే మూడు యూనిట్లు కొంచెం కఠినంగా ఉంటాయి. ఒక యూనిట్లో సిలబస్ విస్తృతంగా ఉంటుంది.

పేపర్ 4, సెక్షన్–2 తెలంగాణ ఎకానమీ:  

సమకాలిన అంశాలతో పాటు గత ఎనిమిది సంవత్సరాల కాలంలో తెలంగాణ ఆర్థిక వ్యవస్థతో ముడిపడిన యూనిట్లు రెండు అయితే, 1956 నుంచి రాష్ట్ర ఏర్పాటు వరకు ఉన్న అంశాల మీద మూడు యూనిట్లు ఉన్నాయి. రెండు యూనిట్లకు సంబంధించిన అంశాలు పూర్తిగా సంఖ్యలతో కూడినది,  అయితే రెండు యూనిట్లు డేటాతో కూడుకున్నవి. ఒక యూనిట్ పూర్తిగా భూ సంస్కరణలకు సంబంధించింది ఉంటుంది.

పేపర్ 4, సెక్షన్–3 అభివృద్ధి, పర్యావరణ సమస్యలు :

ఇందులో పూర్తిగా సిద్ధాంతాలతో కూడిన యూనిట్లు మూడు అయితే , చట్టాలతో కూడిన యూనిట్ ఒకటి ఉంది. ప్రపంచం ఎదుర్కొంటున్న అతిపెద్ద సమస్య పర్యావరణం. ఈ సబ్జెక్ట్ సులువుగా ఉన్నా ఆన్సర్ రాసే విధానం బాగుండాలి. సమాధానం సరిగ్గా రాస్తే అందరికంటే ఎక్కువ మార్కులు రావడానికి ఆస్కారం ఉంది.

పేపర్ 5, సెక్షన్–1 సైన్స్ అండ్ టెక్నాలజీ:  

సైన్స్ అండ్ టెక్నాలజీ సబ్జెక్ట్  దాదాపు తొంభై శాతం సమకాలిన అంశాలతో కూడుకుంది. కాబట్టి కరెంట్ ఎఫైర్స్ మీద మంచి పట్టు సాధించాలి. రెండు యూనిట్లు మాత్రం భారతదేశ అంతరిక్ష పరిశోధనకు సంబంధించినవి ఉంటాయి.  ఒక యూనిట్ పూర్తిగా శక్తి వనరుల గురించి ఉంటుంది.

పేపర్ 5, సెక్షన్–2 సైన్స్:  

సైన్స్లో ఆధునిక ట్రెండ్ ఏ విధంగా ఉంది అనే అంశంపైన ఈ సెక్షన్ ఉంది. వ్యాక్సిన్ తయారీపైన పూర్తిగా ఒక యూనిట్ కేటాయించారు. భారతదేశంలో ఆధునిక పంటల సైన్స్కి సంబంధించి ఒక యూనిట్ అయితే బయోటెక్నాలజీకి సంబంధించి రెండు యూనిట్లు ఉన్నాయి.  అంటువ్యాధులకు సంబంధించి ఒక యూనిట్ పూర్తిగా ఇచ్చారు.

పేపర్ 5, సెక్షన్–3 డేటా ఇంటర్ప్రిటేషన్:  

ఇది పూర్తిగా ప్రాక్టీస్తో కూడుకున్న సెక్షన్. రోజుకు కనీసం ఒక గంట అయిన ప్రాక్టీస్ చేస్తే మంచి స్కోర్ చేయచ్చు. ఒక యూనిట్ పూర్తిగా డెసిషన్ మేకింగ్ మరియు ప్రాబ్లమ్ సాల్వింగ్తో కూడుకుంది కాబట్టి అందరికి సమానంగానే ఉంటుంది. డేటా ఇంటర్ప్రిటేషన్కి సంబంధించి రెండు యూనిట్లు ఉన్నాయి.

పేపర్ 6, సెక్షన్–1 తెలంగాణ ఆలోచన 1948–1970:

ఈ సెక్షన్ పూర్తిగా థియరీతో కూడుకుంది. దీనిలో ఒక యూనిట్ పూర్తిగా తెలంగాణ చారిత్రక నేపథ్యం అండ్ ముల్కీలతో కూడుకుంది. ముల్కీల నుంచి 1969 వరకు ముఖ్యంగా జరిగన సంఘటనల గురించి ఉంటుంది. మార్కెట్లో దొరుకుతున్న ప్రైవేట్ పుస్తకాలం కంటే తెలుగు అకాడమీ, అంబేద్కర్ ఓపెన్ యూనివర్సిటీ బుక్స్ చదివితే మంచి స్కోర్ సాధించవచ్చు.

పేపర్ 6, సెక్షన్–2 సమీకరణ దశ 1971–1990:  

రెండు యూనిట్లకు సంబంధించిన సమాచారం పూర్తిగా దొరకుతున్న మూడు యూనిట్లకు సంబంధించిన అంశాలు పూర్తిగా అవగాహన చేసుకోవడం ముఖ్యం. తెలంగాణ అస్థిత్వానికి సంబంధించి రెండు యూనిట్లు ఉన్నాయి. కాబట్టి ఈ అంశం పైన పూర్తిగా పట్టు సాధించాలి. సమీకరణ దశలో వ్యవసాయ రంగంలో క్లిష్ట పరిస్థితులు, చేతి వృత్తుల పైన ఎక్కువ ఫోకస్ చేయాలి.

పేపర్ 6, సెక్షన్–3 తెలంగాణ రాష్ట్ర ఏర్పాటు 1991–2014:

తొంభై దశకంలో తెలంగాణ అస్థిత్వం కోసం పోరాటం చేసిన సంస్థలను పూర్తిగా చదువుకోవాలి. తెలంగాణ ఏర్పాటు కోసం పనిచేసిన వివిధ కమిటీలు, అవి ఇచ్చిన రిపోర్టులు పూర్తిగా చదవాలి. వివిధ ఉద్యోగ సంఘాలు, పౌర సమాజం, కవులు, కళాకారులు, విధ్యార్థులు, రచయితలు పోషించిన పాత్రలు చాలా ముఖ్యమైనవి. సకల జనుల సమ్మె, మిలియన్ మార్చ్, సహాయనిరాకరణ ఉద్యమాల గురించి పూర్తి స్థాయిలో అవగాహన పెంచుకోవాలి.