గ్రూప్ 2 పరీక్ష (TSPSC GROUP 2) వాయిదా పడుతుందా.. లేదా.. అనే ఉత్కంఠ కొనసాగుతోంది. పరీక్ష వాయిదా వేయాలని అభ్యర్థులు వేసిన పిటిషన్పై హైకోర్టులో శుక్రవారం విచారణ జరిగింది. గ్రూప్ 2 వాయిదా పై ఎలాంటి నిర్ణయం తీసుకుంటారో చెప్పాలంటూ టీఎస్పీఎస్సీకి హైకోర్టు సోమవారం వరకు గడువు ఇచ్చింది. ఆగస్టు 2 నుండి ఆగస్టు 30 వరకు వివిద రకాల 21 పోటీ పరీక్షలు జరుగుతున్నాయని పిటిషనర్ తరపు న్యాయవాది హైకోర్టుకు నివేదించారు. అందులో ఈ నెల 29, 30 న గ్రూప్ 2 పరీక్ష కూడా నిర్వహిస్తుండటంతో పరీక్ష రాయడం అభ్యర్థులకు ఇబ్బందిగా మారిందని పిటిషన్లో ప్రస్తావించిన అంశాలను కోర్టు దృష్టికి తీసుకెళ్లారు. అభ్యర్థుల ఇబ్బందులను దృష్టిలో పెట్టుకొని గ్రూప్ 2 పరీక్ష వాయిదా వేయాలని కోరారు.
గ్రూప్ 2 పరీక్షకు దాదాపు 5.50 లక్షలు మంది అప్లై చేసుకున్నారని.. అందులో 90 శాతం మంది పోస్ట్ పోన్ చేయాలని కోరుతున్నారని పిటిషనర్ తరపు న్యాయవాది వాదన వినిపించారు. గ్రూప్ 2 రాసే అభ్యర్థులు మిగిలిన పరీక్షలు కూడా రాస్తున్నారని కోర్టు దృష్టికి తీసుకెళ్లారు. గ్రూప్ 2 పరీక్షకు 5.5 లక్షలు మంది అప్లై చేసుకున్నారని, గురుకుల్ పరీక్షల కు కేవలం 60 వేల మంది మాత్రమే దరఖాస్తు చేసుకున్నారని టీఎస్పీఎస్సీ తరఫు న్యాయవాది వాదించారు. ఇప్పటికే గ్రూప్ 2 పరీక్ష కోసం అన్ని ఏర్పాట్లు జరిగాయని, 1535 ఎగ్జామ్ సెంటర్ లలో ఏర్పాట్లు చేస్తున్నామని, ఇప్పటికే పరీక్షలు జరిగే స్కూల్, కాలేజీలకు సెలవులు ప్రకటించినట్టు తెలిపారు. కేవలం 150 మంది మాత్రమే గ్రూప్ 2 పరీక్ష వాయిదా వేయాలని పిటిషన్ వేశారని.. సోమవారం తమ నిర్ణయం ప్రకటిస్తామని టీఎస్పీఎస్సీ అడ్వకేట్ హైకోర్టుకు తెలిపారు. వాదనల అనంతరం సోమవారం గ్రూప్ 2 పరీక్ష పై తుది నిర్ణయం తీసుకోవాలని హైకోర్టు టీఎస్పీఎస్సీని ఆదేశించింది. తదుపరి విచారణ సోమవారానికి వాయిదా వేసింది.
దీంతో టీఎస్పీఎస్సీ సోమవారం ఈనెల 14వ తేదీలోగా తీసుకునే నిర్ణయం గ్రూప్ 2 కేసులో కీలకంగా మారనుంది. ఇప్పటికీ ఏర్పాట్లన్నీ పూర్తయినందున గ్రూప్ 2 వాయిదా వేయటం సరైంది కాదని, ఒక్కసారి వాయిదా పడితే.. ఎన్నికలు సమీపిస్తుండటంతో ఇప్పట్లో మళ్లీ పరీక్ష నిర్వహించే అవకాశం ఉంటుందా.. లేదా అనే డోలాయమాన పరిస్థితి ఉత్పన్నమవుతుందని టీఎస్పీఎస్సీ వర్గాలు చెబుతున్నాయి. దీంతో అభ్యర్థులు నష్టపోయే ప్రమాదముందని విశ్లేషిస్తున్నారు. గ్రూప్ 2 దరఖాస్తు చేసుకున్న అభ్యర్థుల్లో 70 శాతం మందికి బీఈడీ లేదని.. వీరెవరూ గురుకుల పరీక్షలకు అర్హులు కానే కారని టీఎస్పీఎస్సీ లెక్కలు తీసింది. మిగిలిన 30 శాతం మంది అభ్యర్థులందరూ గురుకుల్ పరీక్షలు రాసే అవకాశం లేదని కొట్టి పారేస్తున్నారు. గురుకుల్ పరీక్షలన్నీ ఆగస్ట్ 23వ తేదీతో ముగిసిపోతాయని, ఆ తర్వాత వారం రోజులకు జరిగే గ్రూప్ 2 పరీక్ష వాయిదా వేయాలా.. వద్దా.. అనేది మరోసారి తుది సమీక్ష జరిపి నిర్ణయం తీసుకుంటామని టీఎస్పీఎస్సీ వర్గాలు చెబుతున్నాయి. దీంతో హైకోర్టుకు సోమవారం నాడు టీఎస్పీఎస్సీ సమర్పించే నివేదిక కీలకంగా మారనుంది. అప్పటికీ గ్రూప్ 2 పరీక్ష యథాతథంగా షెడ్యూల్ ప్రకారమే నిర్వహించేందుకు టీఎస్పీఎసీసీ మొగ్గు చూపితే.. హైకోర్టు ఇచ్చే తుది తీర్పుపై గ్రూప్ 2 భవితవ్యం ఆధారపడనుంది.
