తెలంగాణ యంగ్ ఇండియా స్కిల్ యూనివర్సిటీలో మరో కొత్త కోర్సు ప్రవేశపెడుతున్నారు. ప్రముఖ ఆప్టోమెట్రిక్ సంస్థ లెన్స్కార్ట్ యూనివర్సిటీ క్యాంపస్లో ఆప్టోమెట్రిక్ స్టోర్ అసోసియేట్లకు ప్రత్యేక కోర్సు నిర్వహించనుంది. ఇందులో భాగంగా మొదటి విడతలో 30 మంది విద్యార్థులకు నెల రోజుల పాటు శిక్షణను అందించనుంది. ఈ మేరకు యంగ్ ఇండియా స్కిల్స్ యూనివర్సిటీ (YISU) లెన్స్‌కార్ట్‌తో అవగాహన ఒప్పందాన్ని (MoU) కుదుర్చుకుంది. కోర్సు విజయవంతంగా పూర్తి చేసిన విద్యార్థులకు లెన్స్ కార్ట్ స్టోర్స్ లో ఉద్యోగాలు పొందవచ్చని యూనివర్సిటీ వైస్ ఛాన్సలర్ వీఎల్వీఎస్ఎస్ సుబ్బా రావు తెలిపారు.
లెన్స్కార్ట్, యంగ్ ఇండియా స్కిల్ యూనివర్సిటీ సంయుక్తంగా ఈ శిక్షణా కార్యక్రమాన్ని ప్రతి రెండు నెలలకు ఒకసారి నిర్వహించాలని నిర్ణయించారు. తమకు అవసరమైన నిపుణులైన ఉద్యోగులను సమకూర్చుకునేందుకు ఈ కోర్సును నిర్వహిస్తున్నట్లు లెన్స్ కార్ట్ ప్రకటించింది. ఈ కొత్త జాబ్ గ్యారంటీ కోర్సుతో విద్యార్థులు ఆప్టోమెట్రిక్ రంగంలో నైపుణ్యాలు సాధించటంతో పాటు లెన్స్‌కార్ట్‌లో వెంటనే ఉద్యోగాలు పొందే అవకాశముంది.
