ఈ విద్యా సంవత్సరానికిగానూ పాలిటెక్నిక్ కోర్సుల్లో ప్రవేశాల కోరకు దరఖాస్తు చేసుకున్న విద్యార్థులకు బుధవారం (మే 17న) పాలిసెట్-2023 పరీక్ష జరగనుంది. దరఖాస్తు చేసుకున్న విద్యార్థులు తమ హాల్ టికెట్లను అధికారిక వెబ్ సైట్ https://polycet.sbtet.telangana.gov.in లో డౌన్‌లోడ్‌ చేసుకోవచ్చు.
ఈ పరీక్ష నిర్వహణకు గాను మొత్తం 296 పరీక్ష కేంద్రాలను ఏర్పాటు చేశారు. ఆయా కేంద్రాల్లో ఉద‌యం 11 గంట‌ల నుంచి మ‌ధ్యాహ్నం 1:30 గంట‌ల వ‌ర‌కు ప్రవేశ పరీక్ష నిర్వహించ‌నున్నారు. మొత్తం 1,05,656 మంది ఈ ప‌రీక్షకు దరఖాస్తు చేసుకున్నారు. వీరిలో అబ్బాయిలు 58,468 మంది, అమ్మాయిలు 47,188 మంది ఉన్నారు.
ఈ ప్రవేశ ప‌రీక్షలో వచ్చిన ర్యాంకు ఆధారంగా రాష్ట్రంలోని ప్రభుత్వ, ప్రయివేటు పాలిటెక్నిక్ కాలేజీల్లో ఇంజినీరింగ్, నాన్ ఇంజినీరింగ్ డిప్లొమా కోర్సుల‌తో పాటు వ్యవ‌సాయ, ఉద్యాన‌వ‌న, వెట‌ర్నరీ డిప్లొమా కోర్సుల్లో ప్రవేశాలు క‌ల్పిస్తారు.
పాలిసెట్ ఎంట్రెన్స్ టెస్టుకు హాజ‌ర‌య్యే విద్యార్థులు ఒక గంట ముందుగానే ప‌రీక్షా కేంద్రాల‌కు చేరుకోవాల‌ని, నిమిషం ఆల‌స్యమైనా ప‌రీక్షా కేంద్రంలోకి అనుమ‌తించబోమని పరీక్ష కన్వీనర్‌ డాక్టర్‌ సి శ్రీనాథ్‌ స్పష్టం చేశారు. విద్యార్థులు తమ హాల్ టికెట్‌తోపాటు ఒక పాస్‌పోర్టు సైజు ఫోటోను వెంట తీసుకువెళ్లాలని సూచించారు. వెంట హెచ్‌బీ బ్లాక్ పెన్సిల్, బ్లూ లేదా బ్లాక్ పెన్, రబ్బర్‌ మాత్రమే తీసుకువెళ్లాలన్నారు. ఎలక్ట్రిక్‌ వస్తువులను లోపలికి అనుమతించమని స్పష్టం చేశారు.
