తెలంగాణ లాసెట్ కు అప్లై చేసుకునే గడువును ఈనెల 30 వ తేదీ వరకు పొడిగించారు. ఎల్ఎల్బీ, ఎల్ఎల్ఎం కోర్సుల్లో ప్రవేశాల కోసం నిర్వహించే లాసెట్, పీజీ ఎల్సెట్ పరీక్ష నిర్వహిస్తారు. ఈ పరీక్షల దరఖాస్తుల గడువు ఏప్రిల్ 15వ తేదీన పూర్తి అయింది. సోమవారం నాటికి మొత్తం 30,365 దరఖాస్తులు అందాయని, ఇందులో మూడేండ్ల ఎల్ఎల్ బీ కోర్సుకు 21,483 అప్లికేషన్లు, ఐదేండ్ల కోర్సు కోసం 6,326, పీజీఎల్ సెట్ కోసం 2,556 అప్లికేషన్లు నమోదయ్యాయి.
అభ్యర్థుల నుంచి వచ్చిన విజ్ఞప్తుల మేరకు ఈ దరఖాస్తుల గడువును పొడిగిస్తున్నట్టు లాసెట్ కన్వీనర్ ప్రొఫెసర్ విజయలక్ష్మి ప్రకటన విడుదల చేశారు. ఎలాంటి ఫైన్ లేకుండా దరఖాస్తు చేసుకునే అవకాశం మంగళవారంతో ముగిసిందని, అయితే అభ్యర్థుల విజ్ఞప్తుల నేపథ్యంలో మరో రెండువారాల పాటు గడువు పొడిగించినట్లు తెలిపారు. ఎలాంటి ఫైన్ లేకుండానే 30వ తేదీ లోపు అభ్యర్థులు అప్లై చేసుకునేందుకు వీలుంది.
మూడేళ్ల ఎల్ఎల్బీ కోర్సుల్లో ప్రవేశాలకు అభ్యర్థులు ఏదైనా విభాగంలో బ్యాచిలర్ డిగ్రీ ఉత్తీర్ణత సాధించాలి. ఐదేళ్ల ఇంటిగ్రేటెడ్ ఎల్ఎల్బీ కోర్సులో ప్రవేశానికి ఇంటర్మీడియట్ లేదా తత్సమాన విద్యను పూర్తి చేసి ఉండాలి. ఎల్ఎల్ఎం ప్రవేశాలకు డిగ్రీతోపాటు ఎల్ఎల్బీ డిగ్రీ పూర్తి చేసి ఉండాలి. ఎలాంటి వయోపరిమితి ఉండదు.
ఇక ఆన్ లైన్ దరఖాస్తుల ఎడిట్ ఆప్షన్ మే 20వ తేదీ నుంచి అందుబాటులోకి వస్తుంది. మే 25 వరకు అవకాశం ఉంటుంది. ఇక మే 30వ తేదీన హాల్ టికెట్లు విడుదలవుతాయి. జూన్ 6వ తేదీన లాసెట్ ఎగ్జామ్ ఉంటుంది. ఉదయం సమయంలో మూడేళ్ల కోర్సుల ప్రవేశ పరీక్ష, మద్యాహ్నం ఐదేళ్ల కోర్సు, పీజీ కోర్సుల్లో ప్రవేశాలకు ఎగ్జామ్ ఉంటుంది.
టీజీ లాసెట్ – 2025కు దరఖాస్తు చేసుకునే జనరల్ అభ్యర్థులు రూ. 900, ఎస్సీ, ఎస్టీ, దివ్యాంగ అభ్యర్థులు రూ. 600 చెల్లించాలి. పీజీ కోర్సుల్లో ప్రవేశాలకు దరఖాస్తు చేసుకునే జనరల్ అభ్యర్థులు రూ. 1100, ఎస్సీ, ఎస్టీ, దివ్యాంగ అభ్యర్థులు రూ. 900 చెల్లించాలి.
ఏప్రిల్ 30వ తేదీ దాటితే అభ్యర్థులు ఫైన్ చెల్లించాల్సి ఉంటుంది. 2025-26 విద్యాసంవత్సరానికి ఈ అడ్మిషన్లు ఉంటాయి. తెలంగాణ ఉన్నత విద్యా మండలి తరపున ఉస్మానియా యూనివర్శిటీ ఈ ఎంట్రన్స్ నిర్వహిస్తోంది. గతేడాది కూడా ఓయూనే నిర్వహించింది.
- హోం పేజీలో కనిపించే ఆన్ లైన్ అప్లికేషన్ పై క్లిక్ చేయాలి.
- ముందుగా నిర్ణయించిన ఫీజును చెల్లించాలి. ఆ తర్వాత అప్లికేషన్ ఫామ్ ఓపెన్ అవుతుంది.
- అప్లికేషన్ ఫామ్ లో మీ వివరాలను నమోదు చేయాలి. ఫొటోతో పాటు సంతకాన్ని అప్ లోడ్ చేయాలి.
- చివరగా సబ్మిట్ నొక్కితే ప్రాసెస్ పూర్తవుతుంది.
- ప్రింట్ లేదా డౌన్లోడ్ పై నొక్కి కాపీని పొందవచ్చు.
