సివిల్ సర్వీసెస్ నోటిఫికేషన్ విడుదల

యూపీఎస్సీ సివిల్ సర్వీసెస్ ఎగ్జామినేషన్ (CSE) 2026 నోటిఫికేషన్ విడుదలైంది. ఐఏఎస్, ఐపీఎస్ వంటి ప్రతిష్టాత్మక సర్వీసుల్లో చేరాలనుకునే అభ్యర్థులకు ఇది అద్భుతమైన అవకాశం. మొత్తం 933 ఖాళీల భర్తీకి సంబంధించి ఫిబ్రవరి 4 నుంచి అప్లికేషన్ ప్రక్రియ ప్రారంభమైంది. డిగ్రీ పూర్తి చేసిన అభ్యర్థులు ఫిబ్రవరి 24వ తేదీ లోపు ఆన్‌లైన్ ద్వారా అప్లై చేసుకోవచ్చు. ప్రిలిమ్స్, మెయిన్స్ , ఇంటర్వ్యూ అనే మూడు దశల ద్వారా అభ్యర్థుల ఎంపిక జరుగుతుంది.

ఐఏఎస్ (IAS), ఐపీఎస్ (IPS), ఐఎఫ్ఎస్ (IFS) వంటి సుమారు 24 రకాల గ్రూప్-ఏ, గ్రూప్-బీ సర్వీసుల కోసం ఈ పరీక్ష నిర్వహిస్తారు.

ముఖ్యమైన తేదీలు:
అభ్యర్థులు ఫిబ్రవరి 24వ తేదీ సాయంత్రం 6 గంటల వరకు ఈ పోస్టుల కోసం అప్లై చేసుకోవచ్చు. ప్రిలిమినరీ పరీక్షను మే 24న నిర్వహించనున్నారు.

ఖాళీలు, కేటగిరీలు:
ఈ ఏడాది నోటిఫికేషన్‌లో సుమారు 933 ఖాళీలను ప్రకటించారు. ఇందులో ఆల్ ఇండియా సర్వీసులు, సెంట్రల్ సర్వీసులు గ్రూప్-ఏ , గ్రూప్-బీ పోస్టులు ఉన్నాయి. రిజర్వేషన్ నిబంధనల ప్రకారం.. ఎస్సీ, ఎస్టీ, ఓబీసీ, దివ్యాంగులకు కేటాయింపులు ఉంటాయి.

అర్హత,వయస్సు:
ఏదైనా గుర్తింపు పొందిన యూనివర్సిటీ నుంచి డిగ్రీ పూర్తి చేసిన వారు ఈ పరీక్షకు అర్హులు. ఫైనల్ ఇయర్ విద్యార్థులు కూడా అప్లై చేసుకోవచ్చు. వయస్సు 21 ఏళ్ల నుంచి 32 ఏళ్ల మధ్య (ఆగస్టు 1, 2026 నాటికి) ఉండాలి. ఎస్సీ/ఎస్టీలకు 5 ఏళ్లు, ఓబీసీలకు 3 ఏళ్ల వయో సడలింపు ఉంటుంది.

పరీక్షా విధానం – ప్రిలిమ్స్:
తొలి దశలో ప్రిలిమ్స్ పరీక్ష ఉంటుంది. ఇది ఆబ్జెక్టివ్ తరహాలో జరుగుతుంది.

పేపర్ 1 (GS): 200 మార్కులు. దీని ఆధారంగానే మెయిన్స్‌కు కటాఫ్ నిర్ణయిస్తారు.

పేపర్ 2 (CSAT): 200 మార్కులు. ఇది క్వాలిఫైయింగ్ మాత్రమే (కనీసం 33% మార్కులు రావాలి). తప్పుగా గుర్తించిన ప్రతి సమాధానానికి 1/3 వంతు నెగటివ్ మార్కింగ్ ఉంటుంది.

మెయిన్ ఎగ్జామినేషన్, ఇంటర్వ్యూ:
మెయిన్స్ పరీక్షలో మొత్తం 9 పేపర్లు ఉంటాయి. రెండు లాంగ్వేజ్ పేపర్లు క్వాలిఫైయింగ్ కాగా, మిగిలిన 7 పేపర్లు (ఎస్సే, 4 జనరల్ స్టడీస్, 2 ఆప్షనల్) మొత్తం 1750 మార్కులకు ఉంటాయి. మెయిన్స్‌లో క్వాలిఫై అయిన వారికి 275 మార్కులకు ఇంటర్వ్యూ నిర్వహిస్తారు.

అప్లికేషన్ ఫీజు:
జనరల్/ఓబీసీ అభ్యర్థులకు రూ. 100 ఫీజు ఉండగా.. ఎస్సీ, ఎస్టీ, మహిళలు, దివ్యాంగులకు ఎలాంటి ఫీజు ఉండాలి.

అప్లికేషన్ విధానం:
అభ్యర్థులు ముందుగా UPSC OTR (One Time Registration) పూర్తి చేయాలి. అనంతరం upsconline.nic.in వెబ్‌సైట్‌లో అప్లికేషన్ పూర్తి చేయాలి.