తెలంగాణ ఎంసెట్ నోటిఫికేషన్ శుక్రవారం (ఈనెల 24న) వెలువడనుంది. మధ్యాహ్నం 12 గంటలకు నోటిఫికేషన్ రిలీజ్ చేయనున్నట్లు హైదరాబాద్ జేఎన్టీయూ కన్వీనర్ దీన్ కుమార్ ప్రకటన విడుదల చేశారు. రాష్ట్రంలోని యూనివర్సిటీలు, కాలేజీల్లో ఇంజనీరింగ్, ఫార్మసీ, అగ్రికల్చర్ డిగ్రీలో చేరేందుకు నిర్వహించే ఎంసెట్ను ఈసారి జేఎన్టీయూ నిర్వహిస్తుంది. ఇంటర్ మార్కుల వెయిటేజీ ఉంటుందా.. లేదా అనే విషయంలో ఇప్పటికీ స్పష్టత లేదని యూనివర్సిటీ వర్గాలు వెల్లడించాయి. ఇంటర్ ఫస్టియర్లో వంద శాతం, సెకండియర్లో 70 శాతం సిలబస్ ఆధారంగా ఈసారి ఎంసెట్ పరీక్షను రూపొందించనున్నారు.
కొవిడ్ ఎటాక్ తర్వాత ఇంటర్ మార్కుల వెయిటేజీ లేకుండా ఎంసెట్లో వచ్చే మార్కుల మెరిట్ ఆధారంగా ఇంజనీరింగ్, ఫార్మసీ, అగ్రికల్చర్ సీట్లను అలాట్ చేస్తున్నారు. అదే తరహాలో ఈ ఏడాది కూడా ఇంటర్ మార్కుల వెయిటేజీని తొలిగించే అవకాశాలున్నట్లు ప్రభుత్వ వర్గాలు చెబుతున్నాయి. ప్రధానంగా గవర్నమెంట్ కాలేజీల్లో ఇంటర్ చదివే విద్యార్థులకు ఈ నిర్ణయం మేలు చేయనుంది.
