గ్రూప్ 4 పరీక్ష ఫలితాల మెరిట్ లిస్ట్ విడుదలైంది. రాష్ట్రంలో 8,180 గ్రూప్-4 పోస్టుల భర్తీకి ఎంపికైన మెరిట్ అభ్యర్థుల జాబితాను తెలంగాణ పబ్లిక్ సర్వీస్ కమిషన్ విడుదల చేసింది. ఎంపికైన అభ్యర్థులందరూ ఈనెల 13 నుంచి వెబ్ ఆప్షన్స్‌ నమోదు చేసుకోవాలని ప్రకటన జారీ చేసింది. ధ్రువపత్రాల పరిశీలన తేదీలను త్వరలోనే వెబ్సైట్ లో అందుబాటులో ఉంచుతామని తెలిపింది. సర్టిఫికెట్ల వెరిఫికేషన్కు వచ్చే అభ్యర్థులు తప్పనిసరిగా వెబ్ ఆప్షన్స్‌ నమోదు చేసుకోవాలని సూచించింది. వారిని మాత్రమే విడతల వారీగా ధ్రువపత్రాల పరిశీలనకు అనుమతించనుంది. అభ్యర్థులు వెరిఫికేషన్కు హాజరుకావాల్సిన రోజువారీ తేదీలను కమిషన్ వెబ్‌సైట్‌లో త్వరలోనే అందుబాటులో ఉంచుతుంది. గత ఏడాది జరిగిన ఈ పరీక్షకు సంబంధించి ఫిబ్రవరి 9వ తేదీన గ్రూప్ 4 జనరల్‌ ర్యాంకుల జాబితాను టీజీపీఎస్సీ ప్రకటించింది.
అభ్యర్థులందరూ తీసుకురావాల్సిన సర్టిఫికెట్లు
1. ఒకటో తరగతి నుంచి ఏడో తరగతి వరకు స్టడీ/నివాస ధ్రువీకరణ పత్రం
2. కుల ధ్రువీకరణ పత్రం
3. బీసీ నాన్‌ క్రీమీలేయర్ సర్టిఫికెట్.
4. దివ్యాంగులకు ధ్రువీకరణ పత్రం
5. ఈడబ్ల్యూఎస్‌ అభ్యర్థులైతే 2021-22 ఈడబ్ల్యూఎస్‌ ధ్రువీకరణ పత్రం
ధ్రువీకరణ పత్రాల పరిశీలన సమయంలో తప్పనిసరిగా ఈ పత్రాలన్నీ సమర్పించాల్సి ఉంటుంది. సర్టిఫికెట్ల విషయంలో అభ్యర్థులకు అదనపు గడువు ఇవ్వబోమని టీజీపీఎస్సీ స్పష్టం చేసింది.
గత ఏడాది 2023 జులై 1వ తేదీన టీఎస్పీఎస్సీ గ్రూప్-4 పరీక్ష జరిగింది. మొత్తం 8180 గ్రూప్-4 ఉద్యోగాల భర్తీకి నిర్వహించిన ఈ పరీక్షకు 9.12 లక్షల మంది అభ్యర్థులు అప్లై చేసుకున్నారు. వీరిలో 80 శాతం మంది అభ్యర్థులు పరీక్ష రాశారు. 7,62,872 మంది అభ్యర్థులు పేపర్ 1 పరీక్షకు అటెండయ్యారు. మధ్యాహ్నం జరిగిన పేపర్ 2కు 7.61,198 మంది హాజరయ్యారు. వీరికి వచ్చిన మార్కుల ఆధారంగా మెరిట్ లిస్ట్ ను టీజీపీఎస్సీ విడుదల చేసింది.
