ఇంజనీరింగ్ అభ్యర్థులకు తెలంగాణ పబ్లిక్ సర్వీస్ కమిషన్ గుడ్ న్యూస్ చెప్పింది. వివిధ ప్రభుత్వ శాఖల్లో ఖాళీగా ఉన్న మొత్తం 290 అసిస్టెంట్ ఇంజనీర్ స్థాయి పోస్టుల భర్తీ కోసం మూడు వేర్వేరు నోటిఫికేషన్లను విడుదల చేసింది. రోడ్లు, భవనాల (R&B) శాఖతో పాటు తెలంగాణ కాలుష్య నియంత్రణ మండలిలో ఈ నియామకాలు జరగనున్నాయి. ప్రభుత్వ రంగంలో స్థిరపడాలనుకునే నిరుద్యోగ యువతకు, ముఖ్యంగా ఇటీవల రాష్ట్ర ప్రభుత్వం గరిష్ట వయోపరిమితిని పెంచిన నేపథ్యంలో.. ఈ నోటిఫికేషన్లు ఒక అద్భుతమైన అవకాశంగా నిలవనున్నాయి.
పోస్టుల వివరాలు, విభాగాలు:
ఈ నియామక ప్రక్రియ ద్వారా మొత్తం 290 పోస్టులను భర్తీ చేయనున్నారు. వీటిలో రోడ్లు, భవనాల (R&B) శాఖలో అసిస్టెంట్ ఎగ్జిక్యూటివ్ ఇంజనీర్ (సివిల్) పోస్టులు 215, అసిస్టెంట్ ఎగ్జిక్యూటివ్ ఇంజనీర్ (ఎలక్ట్రికల్) పోస్టులు 56 ఉన్నాయి. వీటితో పాటు తెలంగాణ కాలుష్య నియంత్రణ మండలి (PCB) లో 19 అసిస్టెంట్ ఎన్విరాన్మెంటల్ ఇంజనీర్ పోస్టులను భర్తీ చేయనున్నారు.
విద్యార్హతలు:
AEE (సివిల్): సివిల్ ఇంజనీరింగ్లో బీఈ/బీటెక్ లేదా AMIE అర్హత కలిగి ఉండాలి.
AEE (ఎలక్ట్రికల్): ఎలక్ట్రికల్ లేదా ఎలక్ట్రికల్ అండ్ ఎలక్ట్రానిక్స్ ఇంజనీరింగ్లో డిగ్రీ పూర్తి చేసి ఉండాలి.
అసిస్టెంట్ ఎన్విరాన్మెంటల్ ఇంజనీర్: సివిల్, కెమికల్, బయోటెక్నాలజీ, మైనింగ్, లేదా ఎన్విరాన్మెంటల్ ఇంజనీరింగ్లో డిగ్రీ లేదా సంబంధిత పీజీ అర్హత ఉండాలి.
వయోపరిమితి:
అభ్యర్థుల వయస్సు జులై 1 నాటికి 18 నుంచి 46 సంవత్సరాల మధ్య ఉండాలి. అదనంగా ఎస్సీ, ఎస్టీ, బీసీ, ఈడబ్ల్యూఎస్ అభ్యర్థులకు 5 సంవత్సరాలు, దివ్యాంగులకు 10 సంవత్సరాల వయోసడలింపు వర్తిస్తుంది.
జీతం:
ఈ పోస్టులకు ఎంపికైన అభ్యర్థులకు నెలకు రూ. 54,220 నుంచి రూ. 1,33,630 వరకు జీతం లభిస్తుంది.
ముఖ్యమైన తేదీలు:
ఈ పోస్టులకు కేవలం ఆన్లైన్ ద్వారానే అప్లై చేసుకోవాలి.
సివిల్ పోస్టులు: జూన్ 6 నుంచి జులై 11 వరకు అభ్యర్థులు అప్లై చేసుకోవచ్చు.
ఎలక్ట్రికల్ పోస్టులు: జూన్ 8 నుంచి జులై 15 వరకు అప్లై చేసుకోవడానికి అవకాశం ఉంటుంది.
ఎన్విరాన్మెంటల్ ఇంజనీర్: జూన్ 10 నుంచి జులై 17 వరకు ఈ ఉద్యోగాలకు అప్లై చేసుకోవచ్చు.
పరీక్షల నిర్వహణ:
ఈ పరీక్షలను ఆన్లైన్ (CBRT) విధానంలో నిర్వహిస్తారు. సివిల్, ఎలక్ట్రికల్ AEE పరీక్షలను అక్టోబర్ 2026 లో, అసిస్టెంట్ ఎన్విరాన్మెంటల్ ఇంజనీర్ పరీక్షను సెప్టెంబర్ 2026 లో TGPSC నిర్వహించనుంది.
