503 గ్రూప్-1 పోస్టుల భర్తీకోసం టీఎస్పీఎస్సీ ఉగాది కానుకగా నోటిఫికేషన్ జారీచేసేందుకు ప్రయత్నాలు చేస్తున్నది. ప్రాథమిక సమాచారం మేరకు మొత్తం పోస్టుల్లో 19 శాఖలకు చెందినవి ఉన్నట్టుగా తెలుస్తున్నది.పోస్టుల భర్తీకి ఫైనాన్స్ డిపార్ట్మెంట్ అప్రూవల్ ఇవ్వడంతో.. నోటిఫికేషన్లపై ఆయా రిక్రూట్మెంట్ బోర్డులు కసరత్తు మొదలుపెట్టాయి. ఉగాది రోజున లేదంటే అంతకంటే ముందే నోటిఫికేషన్స్ ఇచ్చేలా ప్లాన్ చేస్తున్నాయి. గ్రూప్ 1లో 503 పోస్టులకు సర్కార్ తెలంగాణ పబ్లిక్ సర్వీస్ కమిషన్ (టీఎస్పీఎస్సీ)కి అనుమతించింది. దీంతో డిపార్ట్మెంట్ల వారీగా పోస్టుల వివరాలు, రోస్టర్, సర్వీస్ రూల్స్, ఇతరత్రా అంశాలపై టీఎస్పీఎస్సీ ఏయే డిపార్ట్మెంట్ నుంచి ఎన్ని పోస్టులు ఉన్నాయనే దానిపై అన్ని డిపార్ట్మెంట్లతో సమావేశం ఏర్పాటు చేసింది. ఈ సందర్భంగా మున్సిపల్ అడ్మినిస్ర్టేషన్ అండ్ అర్బన్ డెవలప్మెంట్ డిపార్ట్మెంట్ నుంచి మున్సిపల్ కమిషనర్ల పోస్టుల భర్తీకి ఆఫీసర్లు ఇండెంట్ ఇచ్చారు. ఇక పోలీసు డిపార్ట్మెంట్లో డీఎస్పీ, కమర్షియల్ టాక్స్ , ట్రాన్స్పోర్ట్ డిపార్ట్మెంట్ల నుంచి కూడా పోస్టుల భర్తీపై క్లియరెన్స్ వచ్చింది. మిగిలిన శాఖల నుంచి కూడా ఈ నెల 28,29 తేదీల్లో పూర్తి వివరాలు ఇవ్వనున్నట్లు చెప్పాయని టీఎస్పీఎస్సీకి చెందిన ఉన్నతాధికారి తెలిపారు. లీగల్ ఓపినియన్ తీసుకుని ఆ వెంటనే నోటిఫికేషన్ ఇచ్చేలా ప్లాన్ చేశారు
పోలీస్ పోస్టుల భర్తీకి క్లియరెన్స్
హెల్త్, మెడికల్ అండ్ ఫ్యామిలీ వెల్ఫెర్ డిపార్ట్మెంట్లో 2662 పోస్టుల భర్తీకి సంబంధించి టీఎస్పీఎస్సీకి రిపోర్ట్ అందింది. పోలీసు రిక్రూట్మెంట్ బోర్డు కూడా ఎస్ఐ, కానిస్టేబుల్ పోస్టుల భర్తీకి క్లియరెన్స్ తీసుకున్నట్లు తెలిసింది. ప్రభుత్వ ఆదేశాలకు అనుగుణంగా నోటిఫికేషన్ ఇచ్చేందుకు అంతా రెడీ చేసుకున్నట్లు ఆఫీసర్లు తెలిపారు. మెడికల్ అండ్ హెల్త్ సర్వీస్ రిక్రూట్మెంట్ బోర్డు ద్వారా 10,028 పోస్టుల భర్తీ నోటిఫికేషన్పై ఇంకా కసరత్తు కొనసాగుతోంది.
కొత్త స్థానికత వర్తింపు ఇలా..
రాష్ట్రపతి ఉత్తర్వుల ప్రకారం 1 నుంచి 7 తరగతుల్లో చివరి 4 ఏళ్లు (అంటే 4,5,6,7 తరగతులు) ఏ జిల్లాలో చదివితే వారు ఆ జిల్లాలో స్థానికులుగా పరిగణిస్తారు. వేర్వేరు జిల్లాల్లో చదువులు కొనసాగించిన వారి విషయంలో 4,5, 6,7 తరగతుల్లో 6,7వ తరగతులు ఏ జిల్లాలో చదివితే ఆ జిల్లాలోనే స్థానికులుగా పరిగణనలోకి తీసుకొంటారు.
