ఆగస్ట్ 7న జరిగిన ఎస్ఐ ప్రిలిమినరీ పేపర్ ఎలా ఉంది.. ఏయే టాపిక్ ల నుంచి ప్రశ్నలు వచ్చాయి..? TSLPRB తెలంగాణ పోలీస్ రిక్రూట్మెంట్ బోర్డు నిర్వహించిన ఈ పరీక్షలో 60 మార్కులు సాధించిన అభ్యర్థులందరూ క్వాలిఫై అయినట్లే. వీరందరూ ఫిజకల్ ఈవెంట్ల అనంతరం మెయిన్ ఎగ్జామ్ రాయాల్సి ఉంటుంది. ఈనెల 28వ తేదీన కానిస్టేబుల్ ప్రిలిమినరీ ఎగ్జామ్ జరుగనుంది. దాదాపు ఆరు లక్షల మంది ఎస్ఐ, కానిస్టేబుల్ పోస్టులకు పోటీ పడుతున్నారు. ఇటీవలి ఎస్ఐ ప్రిలిమినరీ ఎగ్జామ్లో వచ్చిన 200 ప్రశ్నల తీరు.. అడిగిన టాపిక్లపై అవగాహన పెంచుకుంటే..TSLPRB నిర్వహించే పరీక్షల్లో ప్రశ్నలపై ఒక అంచనాకు వచ్చే అవకాశముంటుంది. అందుకే.. అభ్యర్థుల అవగాహన కోసం ఈ విశ్లేషణ.
| SUBJECT | No.OF QUESTIONS |
| రీజనింగ్ | 52 |
| అర్థమెటిక్ | 48 |
| ఇండియన్ హిస్టరీ | 17 |
| జనరల్ సైన్స్ | 18 (బయాలజీ 5, ఫిజిక్స్ 2 కెమిస్ట్రీ 1, సైన్స్ అండ్ టెక్నాలజీ 5 ఎన్విరాన్మెంట్ 4) |
| జాగ్రఫీ | 18 (ఇండియన్ జాగ్రఫీ 10 వరల్డ్ జాగ్రఫీ 8) |
| తెలంగాణ ఉద్యమం | 16 |
| ఎకానమీ | 10 |
| పాలిటీ | 8 |
| కరెంట్ అఫైర్స్ | 8 |
| ఇతరములు | 5 |
పాలిటీలో బేసిక్స్పై ప్రశ్నలు
పాలిటీ నుంచి ఇచ్చిన మొత్తం ఎనిమిది ప్రశ్నలనూ ఓ మోస్తారు ప్రిపరేషన్ స్థాయి వ్యక్తులు కూడా సరైన ఆన్సర్స్ చేయవచ్చు. పాలిటీలో వచ్చిన ప్రశ్నలన్నీ బేసిక్స్పైనే వచ్చాయి. రాజ్యాంగంలో ఏ భాగంలో సవరణల గురించిన సమాచారం ఉంటుంది? పార్లమెంట్ అనగా? గ్రామ పంచాయతీ స్థాయిలో ఒక నిర్ణీత గ్రామంలో ఓటుకు నమోదు చేసుకున్న వారందరూ భాగమై ఉన్న వ్యవస్థను ఏమంటారు? ప్రస్తుతం భారతదేశంలో ఎలాంటి పార్టీ వ్యవస్థ ఉంది? రాజ్యాంగేతర సంస్థ ఏది? వంటి ప్రశ్నలను ఎవరైనా సమాధానం ఇచ్చేలా ఉన్నాయి. పాలిటీలో కీలక భాగమైన ప్రాథమిక హక్కులు, ఆదేశిక సూత్రాల నుంచి వచ్చిన ప్రశ్నలు కూడా ఈజీగా ఉన్నాయి.
ఎకానమీ
ఎకానమీలో కరెంట్ ఎకానమీ నుంచి నాలుగు ప్రశ్నలు వచ్చాయి. నిరుద్యోగం, ప్రణాళికలు, జీడీపీ నుంచి ఒక్కో ప్రశ్న వచ్చినా కఠినంగా మాత్రం లేవు. మొదటి పారిశ్రామిక విధానం ఎప్పుడు ప్రారంభించబడింది? ద్రవ్య విధానం అంటే? వంటి ప్రశ్నలు సాధారణ స్థాయిలోనే ఉన్నాయి. ప్రస్తుతం శ్రీలంక సంక్షోభాన్ని దృష్టిలో పెట్టుకొని ఒక దేశ తన నగదును చెల్లించలేని స్థితిలో ఉన్నప్పుడు ఏ సంస్థ ఆదుకుంటుంది వంటి ప్రశ్నలు వచ్చాయి. మానవ అభివృద్ధి సూచికలపై రెండు ప్రశ్నలను అడిగారు.
కఠినంగా ఇండియన్ హిస్టరీ ప్రశ్నలు
ఎస్ఐ ప్రిలిమినరీలో ఇండియన్ హిస్టరీ నుంచి 17 ప్రశ్నలు కఠినంగా ఉన్నాయి. పేపర్ మిగతా సబ్జెక్టుల నుంచి వచ్చిన ప్రశ్నలు ఫ్యాక్ట్ బేస్డ్గా నేరుగా అడిగారు. క్రోనాలజీ ఆధారంగా రెండు ప్రశ్నలు వచ్చాయి. ఉదాహరణకు
కింది రాజకీయ సంస్థలను అవి ప్రారంభించిన సంవత్సరం ఆధారంగా క్రమానుగతంగా అమర్చండి?
ఎ. ఇండియన్ అసోసియేషన్
బి. పునా సార్వజనిక సభ
సి. మద్రాసు మహాజన సభ
డి. బాంబే ప్రెసిడెన్సీ అసోసియేషన్
పై ప్రశ్నకు సమాధానం గుర్తించాలంటే భారత జాతీయోద్యమ కాలంలో ఏర్పడిన అన్ని సంస్థలపై అవగాహన ఉండాలి.
మౌర్యులు 1, జైనమతం 1, కవులు– గ్రంథాలు1, ఢిల్లీ సుల్తానులు 1, మొఘలులు 1, మరాఠాలు 1, బహమనీలు 2, భక్తి ఉద్యమం 1, సామాజిక ఉద్యమం 1, మోడ్రన్ హిస్టరీ నుంచి 6 ప్రశ్నలు వచ్చాయి.
నేరుగా వచ్చి 2 ప్రశ్నలు కూడా కఠినంగానే ఉన్నాయని చెప్పాలి. ఇండియన్ హిస్టరీ ప్రశ్నలకు లోతుగా చదివిన అభ్యర్థులు మాత్రమే సమాధానం ఇచ్చేలా ఉన్నాయి. అంటే.. ఇండియన్ హిస్టరీలో అభ్యర్థి విషయ పరిజ్ఞానాన్ని పరీక్షించేలా క్వశ్చన్స్ ఫ్రేమ్ చేసినట్టు కనిపిస్తున్నది. ప్రతిసారి ప్రశ్నలు వచ్చే సింధు నాగరికత, వేద నాగరికతల నుంచి ప్రశ్నలు రాలేదు.
