ఆర్జీయూకేటీ (RGUKT- Rajiv Gandhi University of Knowledge Technologies) బాసర ట్రీపుల్ ఐటీలో 2023-24 విద్యా సంవత్సరంలో ప్రవేశాలకు నోటిఫికేషన్ విడుదలైంది. ఆరేండ్ల ఇంటిగ్రేటేడ్ బీటెక్ కోర్సు ఇక్కడ అందుబాటులో ఉంది. టెన్త్ ఉత్తీర్ణులైన విద్యార్థులు ఆన్లైన్ ద్వారా దరఖాస్తు చేసుకునేందుకు అర్హులు. జూన్ 5వ తేదీ నుంచి అప్లికేషన్లు స్వీకరిస్తారు. జూన్ 19 అప్లికేషన్లకు తుది గడువు. దరఖాస్తు చేసుకోవాల్సిన వెబ్సైట్ www.rguket.ac.in జూన్ 26న ఎంపికైన విద్యార్థుల జాబితా విడుదల చేస్తారు.
ఓసీ, బీసీ అభ్యర్థులు దరఖాస్తు రుసుం రూ. 500, ఎస్సీ, ఎస్టీ అభ్యర్థులకు రూ. 450 చెల్లించి ఆన్లైన్లో అప్లై చేసుకోవాలి. దరఖాస్తు ఫీజుతో పాటు సర్వీసు చార్జీ అధనంగా రూ. 25 చెల్లించాలి. ఆన్లైన్ దరఖాస్తు సమర్పించినప్పుడు ఇచ్చిన రశీదు, టెన్త్ హాల్ టికెట్, మార్కుల లిస్టు, నివాసం, అభ్యర్థుల కుల ధ్రువీకరణ పత్రాలు, వికలాంగులైతే వైకల్యా నిర్ధారణ సర్టిఫికేట్, సైనికోద్యోగుల పిల్లలైతే సంబంధిత అధికారి జారీ చేసిన ధ్రువీకరణ పత్రం, ఎన్సీసీ, స్పోర్ట్స్ కోటా అభ్యర్థులైతే సంబంధిత అధికారి జారీ చేసిన పత్రాలు సమర్పించాల్సి ఉంటుంది.
సెలెక్షన్ ప్రాసెస్..
టెన్త్ లో వచ్చిన జీపీఏ ఆధారంగా అడ్మిషన్లు కల్పిస్తారు. దరఖాస్తులు చేసుకున్న విద్యార్థుల జీపీఏలు ఒక్కటైతే వరుసగా గణితం, జనరల్ సైన్స్, ఇంగ్లిష్, సోషల్లో ఎక్కువగా గ్రేడ్ వచ్చిన వారికి ప్రాధాన్యం ఇస్తారు. ఇవన్నీ సమానంగా ఉంటే ఫస్ట్ లాంగ్వేజ్లో ఎక్కువ గ్రేడ్ వచ్చిన వారిని ఎంపిక చేస్తారు. ఇవన్నీ సమానంగా ఉంటే హాల్ టికెట్ నంబర్ ఆధారంగా ఎంపిక చేస్తారు.
