గ్రూప్ 1 ప్రిలిమినరీ రాతపరీక్షకు ఏర్పాట్లు వేగవంతమయ్యాయి. జూన్ 1వ తేదీన హాల్ టికెట్లు జారీ చేయనున్నట్లు టీఎస్పీఎస్సీ వెబ్ నోట్ విడుదల చేసింది. జూన్ 9వ తేదీన టీఎస్పీఎస్సీ గ్రూప్ 1 ప్రిలిమినరీ పరీక్ష జరుగనుంది. పరీక్షను ఆఫ్ లైన్లోనూ నిర్వహించినున్నట్లు క్లారిటీ ఇచ్చింది. ఓఎంఆర్ పద్దతిలో నిర్వహించనున్నట్లు టీఎస్ పీఎస్సీ కమిషన్ ప్రకటించింది. ఓఎంఆర్ షీట్ మోడల్ కూడా కమిషన్ విడుదల చేసింది. ప్రిలిమ్స్లో ఉత్తీర్ణులైన అభ్యర్థులకు అక్టోబర్ 21 నుంచి మెయిన్స్ పరీక్ష నిర్వహించనున్నట్లు ఇప్పటికే కమిషన్ ప్రకటించింది. రాష్ట్ర వ్యాప్తంగా 33 జిల్లా కేంద్రాల్లో టీఎస్పీఎస్సీ గ్రూప్ 1 ప్రిలిమినరీ పరీక్ష నిర్వహించనుంది.
జూన్ 9న ఉదయం 10.30 నుంచి మధ్యాహ్నం ఒంటి గంట వరకు పరీక్ష జరుగుతుంది. 4.03 లక్షల మంది ఈ పరీక్షకు దరఖాస్తు చేసుకున్నారు. 2022లో ఇచ్చిన గ్రూప్ 1 నోటిఫికేషన్ రద్దు చేసిన కమిషన్ 563 ఉద్యోగాలతో ఈ ఏడాది ఫిబ్రవరిలో కొత్త నోటిఫికేషన్ జారీ చేసింది. ఫిబ్రవరి 23 నుంచి మార్చి 16 వరకు ఆన్ లైన్లో దరఖాస్తులను స్వీకరించింది. గతంలో ప్రశ్నపత్రాల లీకేజీ, పరీక్ష నిర్వహణలో లోపాలు తలెత్తడంతో ప్రిలిమ్స్ క్యాన్సిల్ అయిన విషయం తెలిసిందే. ఈ నేపథ్యంలో మరోసారి అలాంటి పొరపాట్లు జరగకుండా కమిషన్ పకడ్బందీ ఏర్పాట్లు చేస్తోంది. నిబంధనలను పాటించడంలో అభ్యర్థులు, సిబ్బంది నిర్లక్ష్యం వహించినట్లయితే కఠిన చర్యలు తీసుకోవాలని నిర్ణయించింది.
ప్రిలిమ్స్ ను ఓఎంఆర్ పద్ధతిలో నిర్వహించాలని కమిషన్ నిర్ణయించింది. ఈ మేరకు అభ్యర్థులకు సమాచారం ఇస్తూ వెబ్ నోట్ కూడా జారీ చేసింది. ఈ పరీక్షను ఓఎంఆర్ లేదా సీబీఆర్టీ (కంప్యూటర్ ఆధారిత పరీక్ష) ఏదొక పద్దతిలో నిర్వహించాలని, దీనిపై కమిషన్ తుది నిర్ణయం తీసుకుంటుందని నోటిఫికేషన్ లో పేర్కొంది. ఈసారి 4.03 లక్షల దరఖాస్తులు రావడంతో సీబీఆర్టీ విధానంలో అయితే సెషన్ల వారీగా పరీక్షలు నిర్వహించాల్సి వస్తుందని కమిషన్ అంచనా వేసింది. అందుకే ఒక్కరోజులోనే పూర్తి చేసేందుకు ఓఎంఆర్ పద్ధతిలో నిర్వహించాలని నిర్ణయం తీసుకుంది. హాల్ టికెట్లు జూన్ 1 నుంచి టీఎస్పీఎస్సీ వెబ్సైట్లో అందుబాటులో ఉంటాయి.
ప్రిలిమ్స్ రాసే అభ్యర్థులకు సూచనలు :
- ప్రిలిమ్స్ రాసే అభ్యర్థులకు కొన్ని సూచనలు చేసింది టీజీపీఎస్సీ. అభ్యర్థులకు వ్యక్తిగత వివరాలతో కూడిన ఓఎంఆర్ పత్రాలు అందజేస్తామని వెల్లడించింది. పరీక్ష సమయంలో ఫింగర్ ప్రింట్, ఫొటో బయోమెట్రిక్ తప్పనిసరిగా ఇవ్వాలని..ఇవ్వనివారిని అనర్హులుగా ప్రకటిస్తామని తెలిపింది. ఈ బయోమెట్రిక్ కు నియామక ప్రక్రియ పలు దశల్లో ధ్రువీకరించుకుంటామని పేర్కొంది.
- అభ్యర్థులకు పరీక్ష రోజు హాల్ టికెట్ నెంబర్, ఫొటో, పేరు, తండ్రి, తల్లిపేర్లు, పుట్టినతేదీ, పరీక్ష కేంద్రం, జెండర్ వివరాలను ముద్రించిన ఓఎంఆర్ ఆన్సర్ షిట్ అందిస్తారు. దీనిలో తప్పులు ఉంటే వెంటనే ఇన్విజిలెటర్ దగ్గరికి తీసుకెళ్లి సాదా ఓఎంఆర్ పత్రాన్ని తీసుకోవాలి.
- -పరీక్ష రాసే ముందు ప్రశ్నపత్రం బుక్ లెట్ నెంబర్, ఓఎంఆర్ షిట్లో నమోదు చేసిన సర్కిళ్లను జాగ్రత్తగా బబుల్ చేయాలి. ఆన్సర్ షిట్లో పేర్కొనచోట అభ్యర్థి, ఇన్విజిలేటర్ సంతకం తప్పనిసరి చేయాలి. జవాబులు గుర్తించేందుకు బ్లూ లేదా బ్లాక్ ఇంక్ పెన్ను వాడాలి.
- -పరీక్ష పూర్తయిన తర్వాత జవాబు పత్రాలను స్కానింగ్ చేసి, అభ్యర్థుల డిజిటల్ కాపీలు వెబ్ సైట్లో పొందుపరుస్తారు. ప్రశ్నపత్రంలో ఇంగ్లీష్ పదాలు, వ్యాక్యాల అర్థం తెలుగులో సరిగ్గా అనువాదం కానట్లయితే ఇంగ్లీష్ వెర్షన్ కాపీని పరిగణలోనికి తీసుకుంటారు.
- -సమాధానాలను గుర్తించేందుకు పొరపాట్లు జరగకుండా ప్రాక్టిస్ చేసేందుకు నమూనా ఓఎంఆర్ షిట్ కమిషన్ వెబ్ సైట్లో పొందుపరిచింది. ఓఎంఆర్ లో వివరాలను సరిగ్గా బబుల్ చేయకుంటే ఆ ఆన్సర్ షిట్ తిరస్కరిస్తామని కమిషన్ తెలిపింది.
- -హాల్ టికెట్ తోపాటు అభ్యర్థులు పరీక్ష కేంద్రానికి ప్రభుత్వం జారీ చేసిన ఏదైనా గుర్తింపు కార్డు ఒరిజినల్ తీసుకువెళ్లాలి.
- పరీక్ష కేంద్రం ఎక్కడుందో ఒక రోజు ముందుగానే తెలుసుకోవాలి. పరీక్ష కేంద్రానికి ఉదయం 9 గంటల చేరుకోవాలి.గేట్లు 10గంటలకు మూసివేస్తారు. ఆ తర్వాత అనుమతించరు.
- -అభ్యర్థులు బయోమెట్రిక్ ను ఇన్విజిలేటర్లు పరీక్ష కేంద్రాల్లో ఉదయం 9.30 నుంచి ప్రారంభిస్తారు. బయోమెట్రిక్ పూర్తయ్యే వరకు అభ్యర్థులెవరూ పరీక్ష కేంద్రం నుంచి బయటకు వెళ్లేందుకు వీల్లుండదు.
- -బయోమెట్రిక్ లో ఫింగర్ ప్రింట్ తీసుకునేందుకు వీలు లేకుంటే అభ్యర్థి ఫొటోను తీసుకుని ఇంక్ ప్యాడ్ ద్వారా వేలిముద్రను బయోమెట్రిక్ గా తీసుకుంటారు.
- -అభ్యర్థులు చేతులపై గోరింటాకు, టాటూలు వేసుకోవద్దు.
షెడ్యూలు ప్రకారం నియామకాలు
గ్రూప్ 1 నియామకాలను షెడ్యూల్ ప్రకారం పూర్తి చేసేందుకు కమిషన్ ముందస్తు కార్యాచరణను సిద్ధం చేసింది. ఫిబ్రవరిలో ఉద్యోగ ప్రకటన జారీ చేసిన తర్వాత జూన్ 9న ప్రిలిమినరీ పరీక్ష నిర్వహించనున్నట్లు తెలిపింది. ప్రధాన పరీక్షలు అక్టోబర్ 21న షురూ అవుతాయని తెలిపింది. దీంతో ప్రిలిమినరీ పరీక్ష రాసిన అభ్యర్థులు ప్రధాన పరీక్షలకు ప్రణాళికాబద్ధంగా సిద్ధమయ్యేందుకు వీలుంటుంది. ప్రధాన పరీక్షలు మొత్తం 7 పేపర్లలో జరగనున్నాయి. మరోవైపు గతంలో ఇచ్చిన జీవో నెంబర్ 55ను కమిషన్ సవరించింది. ప్రిలిమినరీ పరీక్షలో ప్రతిభ చూపించిన అభ్యర్థులను జోన్ల వారీగా పోస్టుల సంఖ్యలకు అనుగుణంగా 1:50నిష్పత్తిలో ప్రధాన పరీక్షకు సెలక్ట్ చేస్తారు. ఆ తర్వాత రిజర్వ్డ్ వర్గాల వారీగా 1:50నిష్పత్తిలో సెలక్ట్ చేస్తారు. రిజర్వ్డ్ వర్గాల్లో అభ్యర్థుల సంఖ్య తక్కువైతే మెరిట్ ఆధారంగా తీసుకుంటారు.
