జాయింట్ సీఎస్ఐఆర్ యూజీసీ నెట్ డిసెంబర్ 2025 సెషన్ పరీక్షకు సంబంధించిన అడ్మిట్ కార్డులను నేషనల్ టెస్టింగ్ ఏజెన్సీ (NTA) విడుదల చేసింది. ఈ పరీక్షలకు అప్లై చేసుకున్న అభ్యర్థులు వెంటనే అధికారిక వెబ్సైట్ నుంచి హాల్ టికెట్లను డౌన్లోడ్ చేసుకోవచ్చు. అభ్యర్థులు తమ అప్లికేషన్ నంబర్, పాస్వర్డ్ లేదా పుట్టిన తేదీ, సెక్యూరిటీ పిన్ను ఉపయోగించి అడ్మిట్ కార్డులను పొందవచ్చు.
పరీక్ష తేదీ, సమయం: ఈ కంప్యూటర్ ఆధారిత పరీక్ష (CBT) డిసెంబర్ 18, 2025న జరగనుంది. పరీక్షలను రెండు షిఫ్టులలో నిర్వహించనున్నారు.
షిఫ్ట్-1 (ఉదయం 9:00 నుంచి మధ్యాహ్నం 12:00 వరకు): లైఫ్ సైన్సెస్, ఎర్త్, అట్మాస్ఫియరిక్, ఓషన్ అండ్ ప్లానెటరీ సైన్సెస్ పేపర్లు జరుగుతాయి.
షిఫ్ట్-2 (మధ్యాహ్నం 3:00 నుంచి సాయంత్రం 6:00 వరకు): కెమికల్ సైన్సెస్, మ్యాథమేటికల్ సైన్సెస్, ఫిజికల్ సైన్సెస్ పేపర్లు ఉంటాయి.
అడ్మిట్ కార్డు డౌన్లోడ్ విధానం:
- అభ్యర్థులు ముందుగా, csirnet.nta.nic.in అనే అధికారిక NTA వెబ్సైట్ లోకి లాగిన్ అవ్వాలి.
2. తర్వాత హోమ్ పేజీలో కనిపించే ‘CSIR UGC NET అడ్మిట్ కార్డ్ 2025’ లింక్పై క్లిక్ చేయండి.
3. లాగిన్ పేజీలో.. మీ అప్లికేషన్ నెంబర్ , పుట్టిన తేదీ (లేదా పాస్వర్డ్) ఎంటర్ చేయండి.
4. తర్వాత సెక్యూరిటీ పిన్ను ఎంటర్ చేసి, ‘సబ్మిట్’పై క్లిక్ చేయండి.
5. వెంటనే మీ అడ్మిట్ కార్డు స్క్రీన్పై కనిపిస్తుంది. డౌన్లోడ్ చేసుకుని, ప్రింటౌట్ తీసుకోండి.
ఈ పరీక్ష సైన్స్ విభాగాల్లో పరిశోధనల కోసం జూనియర్ రీసెర్చ్ ఫెలోషిప్ (JRF) అర్హతను కల్పిస్తుంది. జేఆర్ఎఫ్ అర్హత సాధించిన అభ్యర్థులు CSIR పరిధిలోని ప్రముఖ రీసెర్చ్ సెంటర్లు, యూనివర్సిటీల్లో పీహెచ్డీ (Ph.D.) అడ్మిషన్లకు అప్లై చేసుకోవచ్చు. అంతేకాకుండా.. ఈ పరీక్షలో అర్హత సాధిస్తే.. వివిధ యూనివర్సిటీలు, డిగ్రీ కాలేజీల్లో అసిస్టెంట్ ప్రొఫెసర్ పోస్టులకు అర్హులవుతారు.
