డిగ్రీ సెమిస్టర్ పరీక్షల్లో ఛాయిస్ ప్రశ్నలు పెంచాలని ఉన్నత విద్యామండలి నిర్ణయించింది. ఈమేరకు అన్ని యూనివర్సిటీలకు తగిన సూచనలు చేసింది. రాష్ట్రంలోని ఆరు యూనివర్సిటీల వైస్ చాన్స్లర్లలో రాష్ట్ర ఉన్నత విద్యామండలి చైర్మన్ ఆచార్య ఆర్ లింబాద్రి వివిధ అంశాలపై చర్చించారు. ఈ సందర్భంగా సెమిస్టర్ పరీక్షల నిర్వహణతో పాటు చాయిస్ ప్రశ్నలపై చర్చ జరిగింది. కరోనా కారణంగా క్లాసులు సరిగా జరగకపోవటంతో పరీక్షల్లో విద్యార్థులకు ఛాయిస్ ప్రశ్నలు పెంచాలని నిర్ణయం తీసుకున్నారు.
డిగ్రీ పరీక్షల్లోని ప్రశ్నాపత్రాల్లో ‘సెక్షన్ బీ’ లో ఏ లేదా బీ రాయండి అనే నిబంధనను మార్చి ‘ ఇచ్చిన ప్రశ్నల్లో మీకిష్టమైన వాటికి సమాధానాలు రాయండి’ అని మార్చాలని నిర్ణయించారు. దీంతో విద్యార్థులకు సెమిస్టర్ పరీక్షల్లో ఛాయిస్ పెరగుతుందని ఈ నిర్ణయం తీసుకున్నారు. పరీక్ష సమయంలో మాత్రం ఎలాంటి మార్పు ఉండబోదని.. 3 గంటల్లో పరీక్ష పూర్తి చేయాలని తెలిపారు.
డిగ్రీ ఫస్ట్ సెమిస్టర్కు ఫిబ్రవరి 17 వరకు క్లాసులు నిర్వహించి 18 నుంచి 25వరకు ప్రిపరేషన్ హాలిడేస్, ప్రాక్టికల్స్ నిర్వహించనున్నారు. ఫిబ్రవరి 28నుంచి మార్చి 24 వరకు సెమిస్టర్ పరీక్షలు జరపాలని నిర్ణయించారు.
వీటితో పాటు రాష్ట్ర వ్యాప్తంగా యూనివర్సిటీల్లో పలు కోర్సుల్లో మిగిలిన సీట్ల భర్తీకోసం సీపీగేట్ కౌన్సెలింగ్ మరోసారి జరపాలని మీటింగ్లో నిర్ణయించారు. ఇప్పటికే మూడు విడతల్లో కౌన్సెలింగ్ నిర్వహించగా మిగిలిన సీట్ల భర్తీకి నిర్వహించే ఈ చివరి కౌన్సెలింగ్ను సద్వినియోగం చేసుకోవాలని విద్యార్థులకు కోరారు.
